Nor

Joseba Beramendi dut izena, Exprai bezala sinatzen badut ere.

Iruindarra. Marrazkilaria eta (orain arte) diseinatzailea. Gaztetan zerbait egingo nuela zirudien eta, zahartzaroan, zerbait egin dudanaren itxurak besterik ez egiteko bidean nago. Mota guztietako paperetan aritu naiz marrazten, neurri anitzetako agerkari digitaletan eta, gezurra badirudi ere, irratian. Horretaz gain, hainbat saltsatan nabilen jetalari txit lotsatia izanik, harpajole eta abeslari trazak ere egin izan ditut. Kafe aztarnak izan ditzaket eta, gehienetan, ez dakit ezetz esaten.

Noiztik

30 urtetik gora eman ditut diseinatzaile bezala, diseinu lanetan denetarik egin izan dudalarik: kartelak, liburuak, aldizkariak, mota guztietako kanpainak… administrazio publikorako, enpresa pribatuetarako edo eragile sozialentzako.

Publizitate eta komunikazio agentziatan aritu naiz, baina baita argitaletxe eta komunikabideetan ere, beti ere ikasten, erronka desberdinen aurrean soluzio berriak bilatzen.

Gutxieneko kalitatea izango zuen egindakoak horrenbeste denbora aritzeko (hori ere esan beharko da) baina 2023an, ziklo zabal bat itxi nahian, nirea ere bazen komunikazio agentzia uztea erabaki nuen, marrazteari buru-belarri ekiteko.

Finean, marrazten eman dut bizitza osoa, ahal izan dudan bezala diseinuarekin uztartuz. Eta, hemendik aurrera, hori izango da nire erronka.

Zertan

Marrazkilari gisa esparru guztietan denetarik egiteko aukera izan dut urteotan:

Paperezko zein sareko komunikabideetan tirak egin ditut, iritziko artikuluak ilustratu… Agian baten bat ikusterik izan duzu hauetakoren batean: Gara, Berria, Nabarra, Aizu!, Xabiroi, TMEO, Jakin, H28, Osatuberri…

Agentzien mundua ezagututa, publizitate kanpainetarako marraztu dut behin baino gehiagotan.

Irratian ere aritu naiz, irudigintzan aditu bezala edo tertuliano moduan, Euskalerria Irratian eta Euskadi Irratian bezala. Radio Euskadin, ordea, tertulian hitz egiteaz gain astero marrazteko txanda ere banuen.

Animazioa ere ez zait guztiz arrotza. Telebistarako klip laburrak egin izan ditut Gestmusic ekoiztetxearen bitartez TV3 eta Canal 9 telebistentzat. Zineman pertsonaien diseinuan kolaboratu nuen Black is Beltza II: Ainhoa filmean.

Haur eta gazteentzako ikastaroak eman ditut, baita publiko desberdinendako visual thinking saioak ere. Irakasleei zuzendutako teknika grafiko honen ikastaroak ere eman izan ditut UEUn.

Hala eskatu didatenean, institutuetan, UNEDen edo Kultur Etxeetan hitzaldiren bat eman dut. Nafarroako Komiki Azokan edo beste Liburu Azokatan ere, libururen bat aurkeztu, egileren bat elkarrizketatu edo mahainguruetan parte hartu izan dut.

Zergatik

Horra koxka. Zergatik jarri beharko zinateke nirekin harremanetan?

Pentsatu nahi dut urte askotako eskarmentua dudala lan bakoitzari profesionaltasunez erantzuteko. Denetarik egin behar izanak ofizio asko eman izan dit eta esku soltea daukat behar duzun horri ekiteko.

 

Zer eskaini diezazuket?
      • Estilo aniztasuna behar duzun horretara moldatzeko.
      • Emaitza azkarrak, beti epe barruan.
      • Zure beharrak ulertzeko eta irudikatzeko gaitasuna.
      • Gauza berriak egiteko ilusioa, gogoa eta jakinmina.
      • Genero– eta aniztasun-ikuspegia.
      • Ekoizpen prozesu osoko ezagutza: inprimatzeko, serigrafiarako, sareratzeko behar guztien kontrola eta artxibo egokiak emateko berme osoa.

Orain arte egindakoari begiratu bat eman nahi badiozu, hona hemen lagintxo bat. Orain, nahi baduzu, egin dezagun ikusgarria den zerbait!